अविरल वर्षापछि बाजुरामा विपत्ति : पहिरोले ४ घर क्षति , ४८ परिवार विस्थापित

युवराज बडुवाल – बाजुराको बडीमालिका नगरपालिका–६, कोर्ध साउदबाडामा अविरल वर्षासँगै आएको पहिरोले ठूलो क्षति पुर्‍याएको छ।
पहिरोका कारण ४८ घरपरिवार विस्थापित भएका छन् भने ४ वटा घर पूर्ण रूपमा ध्वस्त भएका छन्। थप २५ घरधुरी उच्च जोखिममा परेका छन्।
पहिरोको जोखिम बढेपछि प्रभावित सबै परिवारलाई सुरक्षित स्थानमा सारिएको छ। घटनास्थलमा नगरपालिका, नेपाल प्रहरी, सशस्त्र प्रहरी, नेपाली सेना र नेपाल रेडक्रसको टोली पुगेर स्थलगत अनुगमन गरेको छ।
प्रभावित परिवारलाई तत्काल त्रिपाल वितरण गरिएको भए पनि उनीहरूका लागि खाद्यान्न, सुरक्षित बसोबास र दीर्घकालीन पुनःस्थापनाको आवश्यकता देखिएको छ।
पहिरोबाट विस्थापित परिवारको राहत, सुरक्षित आवास तथा पुनःस्थापनाका लागि सम्बन्धित निकाय, स्थानीय सरकार र सरोकारवालासँग आवश्यक सहयोगको अपिल गरिएको छ।