बाजुरामा बालविवाह मुद्दामा दोषी ठहर भई ९ वर्षदेखि फरार रहेका एक युवक पक्राउ

बाजुरा – बाजुरामा बालविवाह मुद्दामा दोषी ठहर भई ९ वर्षदेखि फरार रहेका एक युवक पक्राउ परेका छन्।
पक्राउ पर्नेमा जिल्लाको बडीमालिका नगरपालिका–६, कोर्ध निवासी ३४ वर्षीय हर्क बहादुर बडुवाल रहेका छन्। जिल्ला प्रहरी कार्यालय बाजुराबाट खटिएको विशेष अपरेसन टोलीले बिहीबार उनलाई पक्राउ गरेको हो।
जिल्ला प्रहरी कार्यालय बाजुराका सूचना अधिकारी तथा प्रहरी निरीक्षक लक्ष्मीराज जोशीका अनुसार बडुवाललाई जिल्ला अदालत बाजुराले २०७३ साल चैतमा बालविवाह मुद्दामा दोषी ठहर गरेको थियो। अदालतले उनलाई ५ महिना ७ दिन कैद र १० हजार रुपैयाँ जरिवानाको फैसला सुनाएपछि उनी फरार अवस्थामा रहेका थिए। पक्राउपछि उनलाई कैद तथा जरिवाना भुक्तानीका लागि जिल्ला अदालतमा उपस्थित गराइएको प्रहरीले जनाएको छ।त्यसैगरी, जिल्ला अदालतबाट ३५ दिने पक्राउ पुर्जी जारी भई फरार रहेका अर्का एक जना पनि प्रहरीले पक्राउ गरेको छ। ज्यान मार्ने उद्योग मुद्दामा फरार रहेका त्रिवेणी नगरपालिका–५ निवासी २२ वर्षीय दिल धामी पक्राउ परेका हुन्। उनलाई पनि आवश्यक कानुनी कारबाहीका लागि जिल्ला अदालतमा उपस्थित गराइएको प्रहरीले जानकारी दिएको छ।

स्रोत :बडिमालिका खबर