साहित्य पढ्ने मात्र होइन, महसुस गर्ने प्रयास: ‘एक चिहान’ रंगमञ्चमा

गाैरब बिष्ट समर्पण : कक्षा कोठामा पढिएको कथा जब रंगमञ्चमा उत्रिन्छ, त्यसले अर्थ नै फेरिन्छ। यही अनुभूति दिलाउन सुदूरपश्चिममै पहिलोपटक धनगढीमा ‘एक चिहान’ नाट्य प्रस्तुति हुन लागेको छ। हृदयचन्द्रसिंह प्रधानको कृति ‘एक चिहान’ मा आधारित यो प्रस्तुति कक्षा बाहिरको सिकाइलाई जीवन्त बनाउने प्रयास हो ।

बाजुराका १७ वर्षिय सुनिल बुढा ‘कछुवा’ ले उक्त उपन्यासको नाटक रुपान्तरण गरेका हुन् । उनले १५ वर्षको कलिलो उमेरमै ‘सहर जाने बाटो’ खण्डकाव्य लेखेर समाज सेवा पनि गर्दै आइरहेका छन् । उनी अहिले कक्षा १२ मा धनगढीको कैलाली मोडेल मा.वि. मा अध्ययनरत छन् ।

‘गाउँले प्रोडक्सन’ को आयोजनामा उक्त नाटक प्रस्तुल गर्न लागिएको छ । नाटकले उपन्यासका पात्र र द्वन्द्वलाई आँखै अगाडि उभ्याउँछ। विद्यार्थीले पाठ्यपुस्तकका पंक्ति मात्र होइन, कथाभित्रको पीडा, प्रश्न र संवेदनालाई प्रत्यक्ष महसुस गर्न पाउनेछन्। विशेषगरी कक्षा १२ का विद्यार्थीका लागि यो प्रस्तुति पाठ्यक्रम बुझ्ने नयाँ तरिका बन्ने अपेक्षा गरिएको छ।

काठमाडौं र पोखराबाहिर पहिलो पटक सुदूरपश्चिम प्रदेशमा यो नाट्य प्रस्तुति हुँदैछ। विद्यालयका प्राचार्य र नेपाली विषयका शिक्षकलाई विशेष रूपमा आमन्त्रण गरिएको आयोजकले जनाएको छ। कार्यक्रमले साहित्यप्रतिको रुचि बढाउने र विश्लेषणात्मक सोचलाई बलियो बनाउने विश्वास गरिएको छ।

कार्यक्रमको मिति: माघ २३,२४ र २५ गते
स्थान: वैभव प्यालेस एण्ड रिसोर्ट, तारानगर, धनगढी