सुदूरपश्चिम र कर्णालीको अधिकारको लडाइँ लड्दै अछामका मदन बुढा!

राेशन खड्का – सुदूरपश्चिम प्रदेशको अछाम जिल्लाका युवा अगुवा मदन बुढा पछिल्लाे समयमा सुदूरपश्चिम र कर्णाली प्रदेशका जनताको अधिकार, पहिचान र न्यायका पक्षमा निरन्तर आवाज उठाउँदै आएका छन्। सामाजिक न्याय, समान अवसर र प्रदेशको उचित प्रतिनिधित्वको माग गर्दै उनी विभिन्न आन्दोलन र अभियानमा सक्रिय छन्।

बुढा जेनजी आन्दोलन पछिका प्रमुख अभियानकर्तामध्ये एक हुन्। उक्त आन्दोलनमा घाइते भएका र सहिद परिवारका मागहरू अझैसम्म पूरा नभएको भन्दै उनले राजधानीमा समेत धर्ना दिएका थिए। उनका अनुसार,राज्यले सधैं सुदूरपश्चिम र कर्णालीलाई हेर्ने दृष्टिकोण फेरिनु जरुरी छ, अन्यथा यो क्षेत्र सधैं पछाडि पारिनेछ।

उनले जेनजी आन्दोलनपछि बनेको अन्तरिम सरकारमा समेत सुदूरपश्चिम र कर्णाली क्षेत्रको प्रतिनिधित्व आवश्यक रहेको बताएका छन्। उनका भनाइमा, घाइते योद्धा र सहिद परिवारका न्यायका लागि निर्णय तहमा हाम्रो क्षेत्रका प्रतिनिधि हुनैपर्छ, नत्र फेरि पनि आवाज दबाइने खतरा रहन्छ।”

बुढाले संघीयताको वास्तविक भावना व्यवहारमा लागू हुनुपर्नेमा जोड दिएका छन्। संसाधन र अवसरको समान वितरण बिना संघीयता केवल नारामा सीमित हुन्छ,बुढाको भनाइ छ।
मदन बुढा अहिले पनि विभिन्न सामाजिक र राजनीतिक गतिविधिहरू मार्फत सुदूरपश्चिम र कर्णालीको मुद्दा राष्ट्रिय मञ्चमा ल्याउने प्रयास गरिरहेका छन्।बुढालाई युवामाझ ठूलो जनसमर्थन पाएको छ।स्थानीय नागरिकहरूका अनुसार, बुढा जस्ता सचेत र प्रतिबद्ध युवाहरूको कारण सुदूरपश्चिम र कर्णालीको आवाज राजधानीसम्म बलियोसँग पुग्न थालेको छ।

बुढाले अन्त्यमा भने राज्यको नजर, नीति र सोच बदलियो भने मात्र सुदूरपश्चिम र कर्णालीको भविष्य उज्यालो बन्न सक्छ। हामी अधिकारका लागि बोल्दै र लड्दै रहन्छौं जबसम्म न्याय र समानता प्राप्त हुँदैन।