बाजुरामा बहुपक्षीय भिडन्त : आठ उम्मेदवार चुनावी मैदानमा

बाजुरा– प्रतिनिधि सभा निर्वाचनका लागि बाजुरामा यस पटक बहुपक्षीय प्रतिस्पर्धा देखिन थालेको छ। हालसम्म आठ जना उम्मेदवार विभिन्न दल र स्वतन्त्रतर्फबाट मैदानमा उत्रिसकेका छन् भने केही दलले थप उम्मेदवारी घोषणा गर्ने संकेत पनि देखाएका छन्।उम्मेदवारमध्ये नेपाली काँग्रेसबाट जनकराज गिरी, एमालेबाट लालबहादुर थापा, नेपाल कम्युनिष्ट पार्टीबाट प्रकाश बहादुर शाह, राष्ट्रिय स्वतन्त्र पार्टी (रास्वपा) बाट हेमराज थापा, राप्रपा बाट केशर बहादुर शाही, माओवादी केन्द्रबाट भुपेन्द्र सी, प्रगतिशील लोकतान्त्रिक पार्टी (प्रलोपा) बाट दीपक डिसी र स्वतन्त्रतर्फ तपेन्द्र शाही रहेका छन्।

यस पटक परम्परागत दल र नयाँ राजनीतिक शक्ति बीचको प्रतिस्पर्धा विशेष रूपमा देखिएको छ। काँग्रेस र एमालेले पुरानो संगठनात्मक बललाई आधार बनाएर रणनीति बनाइरहेका छन् भने माओवादी केन्द्र र नेपाल कम्युनिष्ट पार्टीले आन्दोलन र वैचारिक प्रतिबद्धतालाई चुनावी एजेन्डामा राखेका छन्। नयाँ दल र स्वतन्त्र उम्मेदवारले भने सुशासन, परिवर्तन र युवामुखी दृष्टिकोणलाई प्रमुख मुद्दा बनाएका छन्।मतदाताका लागि सडक, स्वास्थ्य, शिक्षा, रोजगारी र सञ्चार पहुँचजस्ता विकासका विषय अझै केन्द्रमा छन्। विगतमा निर्वाचित प्रतिनिधिले अपेक्षित परिणाम नदिँदा जनआक्रोश बढेको छ। विश्लेषकहरूको अनुसार, युवा मतदाता, वैदेशिक रोजगारीमा रहेका परिवार र दुर्गम बस्तीका नागरिकको मत निर्णायक बन्न सक्छ।बहुपक्षीय प्रतिस्पर्धाले मत विभाजन बढाउने सम्भावना देखिन्छ। यसले परम्परागत दलका लागि चुनौती र नयाँ दल तथा स्वतन्त्र उम्मेदवारका लागि अवसर सिर्जना गरेको छ। अन्ततः उम्मेदवारको व्यक्तिगत छवि, स्थानीय पहुँच र स्पष्ट विकास दृष्टिकोणले नतिजा तय गर्नेछ। निर्वाचन नजिकिँदै जाँदा उम्मेदवार र दलका नेता बाजुरा भित्र र बाहिर सक्रिय हुँदैछन्।