रवि लामिछाने–बालेन शाहबीच दोस्रो चरणको वार्ता सुरु, कुपन्डोलमा गोप्य छलफल

काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछाने र काठमाडौं महानगरपालिकाका मेयर बालेन्द्र साह (बालेन) बीच दोस्रो चरणको भेटवार्ता सुरु भएको छ।
ललितपुरको कुपन्डोलस्थित बालेनका निकट सहयोगी तथा ब्याञ्जनकार कुमार वेनको निवासमा उनीहरूबीच छलफल चलिरहेको रविनिकट स्रोतले जनाएको छ। स्रोतका अनुसार हाल वार्तामा रवि र बालेन मात्र सहभागी छन्।
यसअघि पनि दुवै नेताबीच कमलपोखरीस्थित रास्वपा नेता असिम शाहको घरमा लामो छलफल भएको थियो। करिब ६ घण्टा चलेको उक्त भेटपछि उनीहरू एउटै गाडीमा बाहिरिएका थिए। तर त्यस भेटवार्ताबाट ठोस राजनीतिक सहमति ननिस्किएपछि बालेनले पछिल्ला दिनहरूमा विभिन्न पक्षसँग छुट्टाछुट्टै संवाद अघि बढाएका थिए।
त्यही क्रममै रवि लामिछाने बालेनसँग भेट गर्न कुपन्डोल पुगेका हुन्। भेटवार्तामा समसामयिक राजनीतिक परिस्थिति र सम्भावित सहकार्यबारे छलफल भइरहेको बताइएको छ।