रास्वापाको केन्द्रीय सदस्य बने – खेमराज साउद

काठमाडौं –  बाजुरा बडिमालिका नगरपालिका वडा नम्बर ०५ निवासी खेमराज साउद राष्ट्रिय स्वतन्त्र पार्टी (रास्वापा) को केन्द्रीय सदस्यमा मनोनीत हुनुभएको छ। पार्टीको केन्द्रीय निर्णयअनुसार उहाँलाई उक्त जिम्मेवारी दिइएको हो।
विभिन्न आन्दोलनहरूमा सक्रिय सहभागिता जनाउँदै अन्याय, अत्याचार, बेथिति र विसङ्गतिविरुद्ध ज्यानको बाजी थापेर सडक संघर्षमा उत्रिएका साउद समाजसेवी अभियन्ताका रूपमा पनि परिचित हुनुहुन्छ। सामाजिक न्याय, सुशासन र जनअधिकारका पक्षमा निरन्तर लड्दै आएको उहाँको संघर्षले आज राष्ट्रिय तहको नेतृत्वमा पुर्‍याएको स्थानीयको भनाइ छ।
सडक आन्दोलनदेखि सामाजिक सेवासम्मको यात्रामा उहाँले सधैं जनताको आवाजलाई प्राथमिकतामा राख्दै आउनुभएको उल्लेख गरिएको छ। उनका समर्थकहरूका अनुसार यो मनोनयन व्यक्तिगत उपलब्धि मात्र नभई आन्दोलनबाट नेतृत्व जन्मिन सक्ने उदाहरण पनि हो।
केन्द्रीय सदस्यको जिम्मेवारीसँगै अब देशको मुहार फेर्ने यात्रा अझ चुनौतीपूर्ण हुने बताइएको छ। विशेषगरी सुदूरपश्चिम र बाजुरा जस्ता पछाडि पारिएका क्षेत्रका मुद्दा सशक्त रूपमा उठाउन अझ बढी अडिग भएर अघि बढ्नुपर्ने अपेक्षा गरिएको छ।
यसैबीच, उहाँको मनोनयनप्रति विभिन्न क्षेत्रबाट बधाई तथा शुभकामना व्यक्त भइरहेका छन्।
“रास्वापाको केन्द्रीय सदस्यमा मनोनीत हुनुभएकोमा हार्दिक बधाई तथा सफल कार्यकालको शुभकामना ,खेमराज साउद” भन्ने सन्देश सामाजिक सञ्जालमा व्यापक रूपमा साझा भइरहेको छ।