बाजुरामा आगलागी: फर्निचर उद्योग र गाडीको ग्यारेजमा क्षति

बाजुरा – बाजुराको जिल्ला सदरमुकाम मार्तडीमा आज आगलागी भएको छ। बडीमालिका नगरपालिका–८ का प्रकाश थापाको पसलमा विद्युत् तार सट हुँदा आगो लागेको जिल्ला प्रहरी कार्यालयका प्रहरी निरीक्षक लक्ष्मीराज जोशीले जानकारी दिनुभयो।

प्रहरीका अनुसार, पसलमा काठको काम भइरहेको बेला अचानक विद्युत् तार सट हुँदा आगो फैलिएको हो। आगलागीको कारणले बडीमालिका–८ तल्लो जिउलामा सञ्चालनमा रहेको फर्निचर उद्योग, गाडीको ग्यारेजसहित पसलमा राखिएका सामान जलेर नष्ट भएका छन्।

सुरक्षाकर्मी र स्थानीयवासीको सक्रियतामा आगो नियन्त्रणमा आएको प्रहरीले जनाएको छ। प्रहरी निरीक्षक जोशीले आगलागीबाट भएको क्षतिको विवरण संकलन भइरहेको जानकारी दिनुभयो।