राष्ट्रपति पौडेल र जेनजीबीच आज साँझ भेट प्रधानमन्त्री कार्की पनि रहने

काठमाडौं  राष्ट्रपति रामचन्द्र पौडेलले आज साँझ जेनजी आन्दोलनका प्रतिनिधिसँग छलफल गर्न लागेका छन्। राष्ट्रपति कार्यालयका अनुसार बैठक बिहीबार अपराह्न साढे ५ बजेका लागि तय गरिएको हो।

राष्ट्रपति कार्यालयले जेनजी पक्षका प्रतिनिधिलाई औपचारिकरूपमा बोलाइसकेको छ। उक्त भेटमा प्रधानमन्त्री सुशीला कार्कीको पनि उपस्थिति रहने बताइएको छ।

स्रोतका अनुसार छलफलमा जेनजी आन्दोलनसँग सम्बन्धित विषयहरूका साथै आगामी निर्वाचन तयारी र राजनीतिक समन्वयका मुद्दामा केन्द्रित कुराकानी हुनेछ।

राष्ट्रपति पौडेलले हाल उत्पन्न राजनीतिक परिस्थितिमा संवादमार्फत समाधान खोज्ने प्रयासका रूपमा यो भेट तय गरेको जनाइएको छ।