बाजुरामा हुलाक महिमाको संदेश दिन खुला देउडा प्रतियोगिता सम्पन्न, रजाली महिला समूह विजेता

बाजुरा, २२ असोज २०८२ – विश्व हुलाक दिवसको अवसरमा बाजुराको मार्तडीमा खुला देउडा गीत प्रतियोगिता सम्पन्न भएको छ। हुलाक सेवाको महत्व र यसको इतिहासबारे जनचेतना बढाउने उद्देश्यले आयोजित प्रतियोगितामा ८ टिम सहभागी थिए।

प्रतियोगितामा प्रत्येक टिमलाई हुलाक सेवा र नागरिकसँगको सम्बन्धका बारेमा ८ मिनेट प्रस्तुति दिने व्यवस्था गरिएको थियो। नेपालमा हुलाक सेवा वि.स. १९३५ देखि सञ्चालनमा छ र हाल पनि सूचना आदानप्रदानको प्रभावकारी माध्यमका रूपमा कायम छ।

कार्यक्रमको अध्यक्षत्व कार्यालय प्रमुख उत्तम बमले गरेका थिए भने प्रमुख अतिथि जिल्ला समन्वय समिति प्रमुख तुलसीराम रोकाया थिए। उहाँले देउडा मार्फत हुलाक सेवाको प्रभाव र सांस्कृतिक प्रवद्र्धनमा योगदान पुगेको उल्लेख गर्नुभयो।

प्रतियोगितामा रजाली महिला समूह प्रथम, गंगा भवानी महिला समूह द्वितीय, र तुलसी महिला समूह तृतीय भए। विजेतालाई क्रमशः १० हजार, ७ हजार र ५ हजार रुपैयाँ नगद पुरस्कार प्रदान गरिएको थियो।

कार्यक्रमले स्थानीय कला, संस्कृति र हुलाक सेवाको महत्वमाथि सकारात्मक सन्देश प्रवाह गरेको बाजुरा जिल्ला हुलाक कार्यालयले जनाएको छ।